….نوابنا الكرام✋🏼

علي منير مزنر

🖊️ كيفكن، طمنونا عنكن، مش عم نسمع حسكن، مشغول بالنا عليكن، منعرف إنو أشغالكن واقفة، ما في إحياء مناسبات، وأسابيع، وأخد بالخاطر، ما في تزفيت طرقات، ومد قساطل مي، وتركيب لمبات بلدية، منعرف إنو معاشاتكم ما عاد تكفي حق بنزين لرنجاتكم ورنجات نسوانكم وولادكم،

🖊️ إن شاء الله عم تلاقو مازوت لموتيرات الكهربا لي بقصوركم، أو متل هالشعب عم تشتروا كيس الشمع بعشرين ألف؟ بس كيف عم تضووا الأسوار والتصاوين والبروجيكترات والكاميرات المحيطة ببيوتكن المتواضعه؟

🖊️إن شاء الله بعدكن قادرين تاكلو لحمة لأن صار الكيلو ب ٨٠ الف وعم يقولو وصل لل ١٠٠ ؟

🖊️إن شاء الله ولادكم ونسوانكن بعدهن قادرين يشتروا تيابهن وساعاتهن وعطرهن وتليفوناتهن من أغلى وأشهر المحلات؟

🖊️ إن شاء الله أسعار الفواكه والقلوبات والقهوة والشاي مش مأثرة على سهراتكم وقعداتكم؟ عن جد طمنونا عنكم، يعني انتو تعودتو على نمط عيش الملوك والأمراء ، وانتو بتمثلو الشعب، وبتتعبو وبتسهرو لتأمنولو العيش الرغيد ومستقبل مشرق ، ومي وكهربا و وزفت وقوانين تحميه، وخدمات وطبابة وضمان شيخوخه، وكل متطلبات الحياة الكريمة، يعني انتو بتفنو عمركن ووقتكن لحتى نحن نرتاح، فصار الوقت إنو نردلك.✍🏽