هيدي شو إسمها؟ سيادة أو مزرعة؟

بقلم علي خيرالله شريف

بصراحة، الإعلاميين عنا أكتريتهم فوضويين
مع ذلك قديش عدد لي عندن كرامة منهم؟
الظاهر الكرامة صايرة وجهة نظر متل الدفاع عن الوطن
يعني لما واحد بلطجي متل توم باراك بيوصفهم بالحيوانات
أقل شي يعملوه تا يثبتولوا إنهم مش حيوانات يغادروا مؤتمرو الصحفي ويروحوا لعند نقابتهم تا تصدر بيان إعلان مقاطعة الوفود الأميركية حتى تعتذر دولتهم منهم ببيان علني وتسحب تبع الحيوانات وتحط مطرحو واحد مهذب شوي.

‎والغريب إننا ما سمعنا صوت وزير الإعلام بول مرقص، الظاهر مستحي عا حالو، أو عم يحط بريانتين عا شعراتو متل العادة. ولا سمعنا أصوات جماعة السيادة، ولا أصوات قنوات التغطية المباشرة للوفود الأميركية والمنبهرة بهم.

ما تواخذوني إني حكيت عا “قلة الكرامة”، لأني شفتها بالعين المجردة لما بعض الإعلاميين هجموا يتصوروا سلفي مع الدلوعة الصهيونية، ونسوا إنو رفيقها وصفهم بالحيوانات قبل دقايق.
.

بس الفخامة كانت ببيان رئاسة الجمهورية أدناه، قال زحطت الكلمة عفوياً من براك ما كان قصدو المسكين…
رئيس جمهورية بجلالة قدرو، يلي أعلن بخطاب القسم إنو بيحترم شعبو حسب الدستور، عم يبرر وصف شعبو بالحيونة.
الظاهر فخامتو متأثر منيح بسماجة مستشارينو متقلبي الولاءات حسب السوق.
وحتى يهديلهم بالهم للصحافيين، باعهم حكي وطبطبلهم عا ظهرهم، وأثنى عا جهودهم. راحوا يتدعفروا بدموعهم من شدة التأثر.

أنا بس بدي أسأل: إذا الشعب بيكون “حيوانات”، الرئيس شو بيكون؟
بيكون راعي مثلاً أو صاحب المزرعة، أو شي تالت؟
قال واجب وطني قال

الثلاثاء ٢٦ آب ٢٠٢٥