خمستعشر ألف مقاتل بلا سلاح

بقلم علي خيرالله شريف

نائب القوات اللبنانية بيار أبو عاصي قال إنو عندهم خمستعشر ألف مقاتل جاهزين للدفاع عن لبنان…
سألته المذيعة سمر أبو خليل: معكم سلاح؟
قلها بكل ثقة: لا بدون سلاح.

بشرفكم اسمعوا هالخبرية:
١٥ ألف مقاتل بدون سلاح جاهزين تا يدافعوا عن لبنان…
ضد مين؟
يعني مين مهدد لبنان؟
مين عم يدمر لبنان؟
مين عم يقصف لينان بالطيارات والقنابل الفوسفورية والعنقودية وكل الأسلحة الأميركية؟

أوعا يا بيار تقلي إيران،
لأن انت بتعرف ونحنا منعرف والناس كلها بتعرف، انو معزوفة الاحتلال الإيراني تجليطة اخترعتوها وعم تتسلوا فيها تسلاية بلا طعمة. لا في احتلال إيراني ولا احتلال أفغاني ولا احتلال تركستاني.

كمان أوعا تقلي ضد إسرائيل،
لأن ما بعمركم قاتلتوها ولا سقط منكم شهيد ضدها.
أكتر من هيك، كل عمركم متحالفين معها وكنتوا عم تتدربوا عندها، وأخدتوا سلاح منها، وعملتوا مجازر بلبنان برعايتها..

بيضل في احتمال واحد يا بياااار:
يلي عم تحضروا مقاتلينكم ضدو
هو عدو بالداخل اللبناني…
ليش عم استنتج هيك؟

اسمع تا قلك ليش:

أولاً لأن ضد أحمد الشرع مستحيل تعملوها، وإنتوا من يوم إجا نازلين فيه غزل وحب وتصفيق..

ثانياً، لأن بعمركم ما دافعتوا عن لبنان ضد عدو خارجي غير الفلسطينيين، وتاريخكم كلو حروب أهليه وذبح عالهوية، وحواجز طيارة، وسرقة ونهب وشتم وطائفية،
وفوق كل هالشي سميتوا حالكم مقاومة لبنانية…
حتى كلمة مقاومة نزعتولها سمعتها.

كيف خمستعشر ألف مقاتل بدهم يدافعوا عن لبنان بدون سلاح؟
بالرقوة مثلاً؟
أو بالشعوذات والطلاسم والسحر abra cadabra؟

أوعا تقلي بالبريستيج وبالدبلوماسبة…
تصور وزير خارجيتكم ياخد معو ١٥ الف مقاتل ويعملوا جولات دبلوماسية عا حكومات الدول والمجتمع الدولي والأحضان العربية.
وشوف ملا منظر ساعتها…
١٥ ألف شخص رايحين جايين.. كم بدك طيارة، وكم مطار وكم صالون شرف وكم أوتيل وكم مطعم فاتح ليل نهار تا يطعميهم…
وبعد بدك كتييير حسابات… يعني بيصير بدك الخمس تريليونات تبع ترامب ما بيكفوك حتى تدافع عن ربع مزارع شبعا.

كمان تعا تا قلك يا بيار بو عاصي؛
إذا ١٥ ألف مقاتل عم تدربوهم يدافعوا عن لبنان بالمحبة والسياسة والوطنية، طيب باقي القوات شو؟
هول ما عندن وطنية؟

خلص مرقتلك ياها
بس بشرفك(؟؟) قلي:

بما إنو الكل ما عندن سلاح، كيف يعني مقاتلين؟
يعني مثلاً عم تدربوهم نينجا وكاراتيه وجودو وتيكواندوا؟

إذا هيك ساعتها نطحة وحدة من تيس الدبلوماسية بتعادل قنبلة نووية، بشرط إنو النطحة تكون قواتية، لأنها بتكون احترافية.

الجمعة ٢٧ حزيران ٢٠٢٥