أخطر جرس إنذار..

ليلى رحيّل

وضعنا كتير خطير.. ايه خطير بسبب كورونا وبسبب كل شي.. وضعنا مؤلم.. وكل دقيقة بنشوف خبر محزن أكتر من التاني.. وضعنا خطير لأن صرنا خايفين عالكبار والزغار والشباب.. 

طفل مصاب نقل العدوى ل 25 شخص من العيلة وما حدا كان شاكك فيه.. شاب بسبب شربة مي لقط كورونا وتوفى بعد 4 أيام.. مواليد جداد خلقوا معهن كورونا.. إعلامية ما بتشكي من شي..

ودكتورة عمرها 28 سنة وخيها قبلها بأسبوع فقدناهم بسبب كورونا.. رجال بأحلى سنين عمرو خسرناه لأن ما في محل بالمستشفى.. عيلة من 5 أشخاص حلّت مصيبة كورونا وقضت عليهن كلهن.. وغيرهن كتار كتار كتار.. 

• 

وبعد في عالم بتتعب حتى تقنعها إنو كورونا مش مزحة.. والكمامة بتسألهن عنها بتطلع بالسيارة أو بالجزدان أو ييي نسيتها بالبيت.. والتجمعات ضاربي أرقام قياسية بعدم التباعد.. أوعم يضحكوا علينا ما في كورونا.. 
الكورونا هالكة كل الدني والعالم.. كتار اللي عم نخسرهن.. كل شي مشلول.. وولادنا راحوا عالمدارس وهمهم بيشغل البال.. همّ صحتهن.. وهمّ علمهن.. وما بنا نخسر لا الصحة ولا العلم.. 
مش مزحة الكورونا.. بشهادة كل المصابين.. اللي عم يموتوا من الوجع.. واللي عم يشوفوا الموت بعيونهن.. واللي ماتوا وما لاقوا جهاز تنفس ينقذهن.. والزغار اللي عم ينصابوا والشباب هني أخطر جرس إنذار..
ما بدها استهتار.. كل أجراس إنذارات الخطر عم تدق.. بدها كتير وعي ومسؤولية.. وحماية وأخلاق..