بحبِّكْ يا ليلى

د. نزار دندش

بحبِّكْ يا ليلى
قدّ مافي تلوّث
بي سما لبنانْ
وقدّ ما في وسخ
بالبحر والنهر والشطآنْ

بحبك قدّ ما الحكام
سارقين الشعب
بحبّك قد ما تدمّر
المرفأ بلبنان

بحبك قدّ ما احترق غابات
ارز مع لزّاب مع سندان
بحبّك قدّ ما في فقر
ببلاد حكامها صبيان

بحبك قدّ الدني …
قد تنكة المازوت والبنزين
بحبك قد علبة حليب
وحبة دوا اعصاب
او اسبرو او اسبيرين
وقد ما في بهالبلد
سماسرة شياطين

بحبك ، يا ليلى
قدّ ما في كسل عنّا
وقدّ ما في شطارة
بكوريا وبالصين

بحبك قدّ ما الماروني
بيعشق كرسة بعبدا
وقدّ ما الشيعي
محمّس يرجّع الأقصى
وقد ما الدرزي
بيحب بيت الدين

بحبك قد ما الحاكم
بيعشق كرستو
وقد ما البيشكّلوا حكومي
بيعملوا دواوين
وقد ما علينا الكلّ متفقين

بحبّك كتير كتير
بسّ مش اكتر
ما شركة كهربا لبنان
عاشقة التوفير والتقنين

بحبك يا ليلى
قدّ ما في بالدني مساكين
وقد ما في بالدني شياطين
وقدّ ما في دمع بالعين