النّار بالنّار يقدّم الحياة الحقيقيّة على الشّاشة بدون تكلُّف بالحوار

جاد وهبي

بوقت معظم النّاس ملتهيّين بمسلسل الزّند، وهو مسلسل بيستاهل النّاس تلتهي فيه وتشوفه وتمدحه لأنّه لهلّق مسلسل ممتاز على كافّة الصُّعُد، بس بهالوقت في عَظَمة عم تصير بمسلسل النّار بالنّار لا تقلّ أهمّيّة، والحلقة الخامسة مبارح كانت من أفضل الحلقات بكلّ دراما رمضان السّنة، المسلسل من بدايته بلّش يرسم خطوط دراما تصاعديّة واقعيّة بتتناول بوحدة من جوانبها الرّئيسيّة النّسيج السّوري اللبناني الموجود حاليًّا بالمدينة اللبنانيّة، وهالدّراما وصلت مبارح لنقطة من نقاط ذروتها المنتظَرة بالمشهد الأخير بالحلقة اللي تعملق فيه وحشَين بالتّمثيل، كاريس بشّار من ميل وجورج خبّاز من الميلة الثّانية، بمواجهة حقيقيّة صارخة واضحة ومباشرة وحوار ممكن يكون بينقال كلّ يوم بالشّارع بين اللبناني والسّوري بس ولا مرّة سمعناه عم ينقال بهالوضوح والحدّة والجَمال على الشّاشة الصّغيرة..

النّار بالنّار عم ينجح لهلّق يقدّم الحياة الحقيقيّة على الشّاشة بدون تكلُّف بالحوار (رامي كوسا) وبدون رمزيّات نتخبّى من خلالها بخيال اصبعنا وبدون أيّ مبالغات بالأداء، لا بل بالعكس، عم نشوف صراع جبابرة حقيقي بالتّمثيل، خاصّةً بين هالأربعة:
عابد فهد راسم شخصيّة استثنائيّة فيها إعادة إكتشاف لنفسه وموهبته الفذّة وعم يلعبها بمزيج تراجيدي كوميدي موزون ومُدهش، جورج خبّاز حامل كلّ خبرة وأستذة المسرح وحاططها بشخصيّة عميقة وطبقاتها كتيرة وعم يقدّمها بأداء تعبيري وصوتي وحركي ما بيشبه شي شايفينه منه قبل هيك، كاريس بشّار عم تقدّم دروس بكيف الممثّل بيشتغل على تفاصيل شخصيّة لتطلع هالقدّ حقيقيّة ونحسّ كأنّو ملتقيين فيها من قبل بالشّارع ومنعرفها، وطارق تميم يلّي بكرّر شكري للشّخص يلّي عطاه هالدّور مين ما كان يكون لأنّه خلّانا نشوف ممثّل مثلُه هالقدّ متمكّن من أدواته شو بيقدر يعطي لمّا ينعطى النَّصّ والفُرصة الصَّحّ.

#النار_بالنار هو مسلسل رمضان يلّي طالع مننا، من بيوتنا وشوارعنا ولحمنا ودمنا، هو برأيي، أكتر دراما بتشبهنا هالسّنة لحدّ اللحظة.